L'iniziativa ha ina greva situaziun da partenza. Il tenor suenter l'emprima debatta mussa che per tut las partidas è l'iniziativa memia radicala. Per la maioritad dal Cussegl naziunal n'ha il sistem da casualitad per eleger ils derschaders e las derschadras federalas nagina legitimaziun democratica. Oz è quella numnadamain avant maun causa che l'assamblea federala elegia las derschadras ed ils derschaders. Cun eleger per lottaria fiss betg pli garantida la diversitad: saja quai danunder che ils derschaders vegnan ni tge lingua che las derschadras discurran.
Dentant concedan parlamentarias e parlamentaris che il sistem na saja betg perfetg. Era la dumonda da la reelecziun suenter sis onns duai vegnir debattada u ina limita dal temp d'uffizi. En la debatta datti duas minoritads da la sanestra che vulan ina cuntraproposta cun megliuraziuns dal sistem. Dentant era quellas na paran betg da chattar avunda sustegn. Tranter auter perquai che moziuns a reguard èn anc pendentas.
Era sche las decisiuns en la chombra gronda vegnan tratgas mardis, èsi gia uss cler che l’iniziativa vegn probabel refusada cleramain.