Siglir tar il cuntegn

Header

cuntegn

Cussegl naziunal Er vinavant naginas sancziuns autonomas da la Svizra

Tar il dretg da sancziuns en Svizra na datti betg ina midada da paradigma – il Cussegl naziunal è ussa tuttina suandà al Cussegl dals chantuns. Vul dir il Cussegl federal duai er en l'avegnir betg pudair decider sancziuns a moda autonoma.

La Svizra po mo surpigliar sancziuns da las Naziuns Unidas, da l'Uniun Europeica u da l'Organisaziun per la segirezza e la collavuraziun en l'Europa, OSZE. En vista a l'offensiva russa en l'Ucraina vuleva il Cussegl naziunal midar quai. La fatschenta è ussa pronta per la votaziun finala.

Anc durant la sessiun da stad era il Cussegl naziunal en vista a la guerra en l'Ucraina s’exprimì encunter che la Svizra po sancziunar autonomamain persunas ed unitads, per exempel interpresas ch’èn participadas a grevas violaziuns dal dretg internaziunal umanitar u dals dretgs umans. La cumpetenza en chaussa avess survegnì il Cussegl federal.

Schlargiar sancziuns existentas

Decis ha il parlament uss midadas relativamain pitschnas. Il motiv era oriundamain ch’il Cussegl federal vuleva prolungar in scumond d’imports d’armas da la Russia e da l’Ucraina, quel era vegnì relaschà l’onn 2015 en consequenza da l’invasiun russa sin la Crim. La missiva al parlament ha la regenza approvà gia l’onn 2019.

Il sboz aveva sulettamain previs ch’il Cussegl federal duaja pudair extender sancziuns sin ulteriurs stadis che n’èn betg sancziunads, en cas che l’interess dal pajais pretenda quai.

Quai han ils cussegls concludì ussa. Ultra da quai han els decidì ch’ina tala extensiun duaja er esser pussaivla per persunas.


RTR novitads 12:00

Artitgels legids il pli savens

Scrollar a sanestra Scrollar a dretga