Il Cussegl naziunal ha cumenzà la debatta davart la revisiun dal provediment professiunal obligatoric (BVG). Gia suenter la debatta d’entrada è cler – ch’il cumpromiss dals partenaris socials ch'ils patruns ed ils sindicats han preschentà il 2019 vegn ad avair grev en la chombra gronda. Puncts principals da la refurma èn la reducziun da la tariffa da conversiun dad oz 6,8% sin 6%, ed las adattaziuns dal sistem a las novas furmas da lavurar cun plazzas parzialas e plirs patruns.
En la debatta da detagl è il Cussegl naziunal suandà las propostas da sia cumissiun che na sustegn betg il project da cumpromiss dals partenaris socials. Tenor ella schlargia quest cumpromiss las prestaziuns da la segunda pitga. La maioritad da la chombra gronda ha enfin ussa decidì da sbassar il nivel d’entrada tar las pajas dad oz 25'510 sin 12'548 francs. Plinavant duain en il futur era persunas giuvnas en la vegliadetgna da 20 fin 25 onns pudair cumenzar a spargnar per la vegliadetgna. Oz e la vegliadetgna francada tar 25 onns ed ensi. Ed enfin la vegliadetgna da 44 onns duai ins pajar da nov 9% da la paja coordinada en la cassa da pensiun, davent da 45 onns da nov 14%.
Refurma sin il dies da la classa inferiura
Tenor la sanestra ed ils sindicats na cuntentan las propostas da la cumissiun betg. Tenor els ston cun las decisiuns da la cumissiun las persunas cun pajas bassas finanziar la refurma. Las persunas bainstantas perencunter possian profitar da deducziuns da taglia. La sanestra smanatscha perquai gia cun il referendum.
Il Cussegl naziunal cuntinuescha la debatta la mesemna e glindesdi che vegn.