Tgi che vul cumprar ina abitaziun u ina chasa en Svizra sto prender viadora la bursa gronda. Ils davos onns han ils pretschs per immobiglias mo enconuschì ina direcziun – ensi. Tenor il studi d’immobiglias 2021 da la Credit Suisse èn ils pretschs per abitaziuns u chasas creschids per passa 5% l'onn passà.
Per ina famiglia normala na saja quai strusch pli pussaivel da realisar il siemi dad in'atgna abitaziun u chasa, di la cussegliera naziunala songagliaisa Esther Friedli da la PPS. Quai saja in problem.
I dat plirs facturs, mo igl è uschia, cunzunt en regiuns urbanas, ch’investiders da l’ester han cumprà ensemen entiras immobiglias e chatschan uschia era amunt ils pretschs
Impedir speculaziun cun immobiglias
Ensemen culs socialdemocrats ed ils verds pretenda la PPS perquai ch'il Cussegl federal duai inoltrar al Parlament federal la revisiun da la Lex Koller, ch'el aveva sepulì il 2018 suenter critica massiva. Previs era en lezza ch'esters da pajais ordaifer l'UE e l'EFTA stoppian puspè dumandar ina lubientscha sch'els vulan cumprar immobiglias, e quai era sch'els abiteschan gia en Svizra. Sper quai aveva el proponia dad era suttametter terren industrial a la lescha e da scumandar ad esters d'investir en societads d’immobiglias svizras.
Esters betg il problem
Il problem na sajan dentant betg ils esters, respunda il cusseglier naziunal grischun Martin Candinas da l'Allianza dal center. La raschun che dapli esters vivan e cumpran era immobiglias en Svizra saja che l'economia marschia bain ed haja uschia clamà lavurers da l’exteriur.
In fatg è simplamain che la surfatscha, ch’è occupada da esters, è sa reducida ils ultims onns. Uschia na pon ins simplamain betg dir che nus vendain ora la patria.
Projects turistics en privel
Mo i saja schon uschia che tschertas regiuns, cunzunt las citads, sajan confruntadas cun tals problems. Ellas regiuns muntagnardas frainia dentant gia la lescha cunter la construcziun da segundas abitaziuns ch’esters pon cumprar immobiglias co els vulan. Da restrenscher anc dapli na fiss betg en l’interess da l'economia e dal turissem els chantuns da muntogna, di Candinas e fa in exempel.
Tar ils blers ressorts èsi davostiers esters che mettan en lur daners, ch’investeschan, che crajan e vulan in svilup en nossas regiuns. Franar in tal svilup senza savair sche nus avain suenter investiders svizzers è ina tgutgadad.
Animar indigens d'investir
Che betg tuttas regiuns da la Svizra sentan il medem squitsch sin ils pretschs da las immobiglias vesa era Esther Friedli. Ed era che las restricziuns el sectur da las segundas abitaziuns pon impedir in svilup en regiuns periferas vesia ella en sia atgna patria, el Toggenburg Sura. Da dentant mo sperar sin investiders da l’exteriur quitta ella fallà.
Jau crai ch’i fiss era bun da guardar che uschè blers investiders svizzers sco pussaivel investissan era gist en las regiuns muntagnardas. Quai sto esser la finamira
Dovri dapli protecziun per immobiglias en Svizra? El Cussegl naziunal vegn quella dumonda a procurar per ina debatta animada.