Concret pretenda la cumissiun da sanadad da stgaffir la basa legala per che malsauns cronics possian retrair cannabis dal medi. Cannabis possia gidar cunter dolurs, malesser e convulsiuns – uschia l’argumentaziun. Ozendi èsi difficil da survegnir ina lubientscha excepziunala.
L'onn passà èn radund 3'000 persunas vegnidas tractadas cun products da cannabis. Savens èn quai persunas pli veglias u persunas che pateschan da malsognas nuncurablas sco sclerosa multipla u cancer en il stadi final. Cannabis po qua mitigiar las dolurs.
Per mintga tractament dovri dentant ina lubientscha excepziunala. Quai vul il Cussegl federal uss midar ed ha incumbensà il departament federal da l'intern da preschentar enfin la stad 2019 ina revisiun da la lescha correspundenta.
Sco proxim sto il Cussegl dals chantuns s’occupar cun la fatschenta.
RR novitads 11:00+
