La «Sonntagszeitung» ha cumpareglià las decisiuns da las fracziuns en il Cussegl naziunal. Ella constatescha che Verds e PS voteschan fitg savens medem. Da rar dettia cas, sco tar la cuntraproposta da l'iniziativa da glatschers, ch'ellas voteschan different.
La PPS e la PLD, las duas partidas a la dretga, na voteschan uschè sumegliant. 2018 era quai 68%, il 2022 anc 58%. Tenor quellas cifras è la perinadad tranter PLD e PPS vegnida pli pitschna.
Tranter PLD e l'Allianza dal Center è la perinadad anc pli pitschna che tranter PLD e PPS.
Betg resguardà: il Cussegl dals chantuns e la sessiun d'enviern
L'analisa da la «Sonntagszeitung» cumpiglia 953 votaziuns da l'onn 2022 en il Cussegl naziunal. La sessiun d'enviern n'è dentant betg vegnida analisada, perquai ch'ils servetschs dal parlament n'han betg mess a disposiziun las infurmaziuns en moda necessaria, tenor la «Sonntagszeitung».
Che Verds e PS èn bler d'ina opiniun, vegn ad esser in argument cunter in terz sez per las partidas sanestras en il Cussegl federal, scriva la «Sonntagszeitung».
