Il Cussegl naziunal vul promover la perscrutaziun e la terapia da malsognas specificas da dunnas. El ha approvà cun 133 cunter 52 vuschs ina moziun da sia cumissiun - quai cunter la veglia dal Cussegl federal.
I dettia numerusas malsognas, sco per exempel endometriosa u mals da la menstruaziun, che pertutgan sulettamain dunnas. La perscrutaziun da tractaments pussaivels haja però grond retard, argumentescha la cumissiun da sanadad dal Cussegl naziunal che ha fatg la moziun. Savens stoppian dunnas viver cun diagnosas sbagliadas u tractaments inadequats.
L'origin da la moziun sajan duas petiziuns da l'ultima sessiun da las dunnas davart la medischina da gender, ha declerà la pledadra da la cumissiun Ruth Humbel (AdC). La problematica saja enconuschenta, ha argumentà la minoritad, per exempel Andreas Glarner (PPS). I na dovria dentant betg ulteriuras incumbensas per il stadi.
