Cunter projects d'abitaziuns pli pitschens en zonas da construcziun na duain uniuns betg pli dastgar far recurs. Il Cussegl naziunal ha decis da restrenscher il dretg da recurs cun 113 cunter 72 vuschs. Concret na duain organisaziuns da natira betg pli pudair far recurs encunter projects d'abitar fin 400 m2 che sa chattan en la zona da fabrica. Cunter questa restricziun èn s’exprimids ils Verds, ils Verd-Liberals e la PS. Sco proxim va la fatschenta en il Cussegl dals chantuns.
Dumond'ins politicras e politichers grischuns èn els ed ellas sin lingia da la partida. Uschia sustegna era Anna Giacometti l'intent. Dentant mo perquai che i sa tracta tenor ella da projects pitschens.
Discurrissan da projects pli gronds e ordaifer la zona da fabrica na sustegness jau betg l'intent. Ma qua vai per projects pitschens ed uschia è quai per mai en urden.
Sustegn survegn la liberaldemocrata era dal politicher da l'Allianza dal Center, Martin Candinas. El di ch’i dettia ina tendenza per adina dapli recurs ch'ins stoppia franar. In organisaziun encunter ina persuna privata na saja betg gist. Per el è impurtant ch'il dretg da recurs da privats encunter privats resta, perquai pos’ins restrenscher il dretg da recurs d'organisaziuns.
Las organisaziuns èn memia pussantas ed impedeschan uschia projects da persunas privatas.
En quest connex vegn discurrì da la vart burgaisa da David encunter Goliat – il privat encunter l'organisaziun. Dentant quai saja ina interpretaziun cumplettamain faussa di il socialdemocrat dal Grischun, Jon Pult. Questa iniziativa parlamentara na possia el betg sustegnair, di il politicher.
Tgi che fabritga ina villa da 400 m2 n’è betg in David mabain economicamain in Goliat. Quest intent vegn be da bun a la lobby d'immobiglias.
I saja impurtant che las organisaziuns possian vinavant far recurs era tar projects fin 400 m2. I giaja per guardar ch'ils interess publics vegnan respectads e che las leschas vegnan tegnidas en. Il 2008 hai dà ina iniziativa dal pievel che ha sustegnì il dretg da recurs da las organisaziuns. Jon Pult è segir che quai è era oz anc il cas. Il suveran haja l'interess da proteger era la natira da construcziuns che na sa tegnan betg vi da las reglas.
Dentant betg mo quels recurs, mabain era quels cunter pli gronds fabricats che sa chattan en la zona da fabrica èn seccants per il politicher da la Partida populara svizra, Roman Hug. Memia blers projects vegnian impedids da tals recurs e per el èsi cler: Sch'i dat projects entaifer la zona da fabrica, duajan ins laschar davent il recurs tras organisaziuns cumplettamain.
Nus stuessan restrenscher il dretg da recurs per las organisaziuns era per projects sur 400 m2.
Il Cussegl naziunal fa mesemna la debatta en chaussa. Quai durant la sessiun speziala che cuzza anc fin mesemna saira.
Il podcast politic. In sguard davant e davos las culissas da la politica naziunala.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
