Siglir tar il cuntegn
cuntegn

Svizra Cussegl naziunal schanegia ils purs

Las stentas da spargnar sin nivel federal vul il Cussegl naziunal realisar senza tutgar ils purs. Quai ha la chombra gronda decidì cun discutar in pachet da spargn. Ils purs hajan gia contribuì lur cumpart da spargnar è stà in dals arguments da la maioritad.

pliras vatgas pasculeschan sin in'alp
Legenda: Vatgas sin l'Alp Zavragia, Sursaissa (maletg simbolic) Keystone

Il Cussegl federal vuleva scursanir ils meds per l'agricultura per 57 milliuns francs. Il Cussegl dals chantuns aveva lura proponì sco cumpromiss 30 milliuns. Era quai n'ha betg chattà ina maioritad en il Cussegl naziunal. Las mesiras da spargn chaschunassen ina reducziun dals pajaments directs da 50 francs. En vista als pretschs sbassants en l'agricultura saja quai irresponsabel, ha ditg Jean-Pierre Grin, PPS/VD.

Era l'AVS vegn schanegiada

Era tar il pli grond post da spargn è il Cussegl naziunal stà ferm. Entras reducir ils tschains dal daivets da l'Assicuranza d'invaliditad AI tar la AVS pudessan vegnir spargnads 132,5 milliuns francs. Envista als tschains negativs ha la cumissiun da finanzas proponì in pe da tschains dad 1%. La sanestra e la partida populara svizra han dentant cumbattì questa proposta. Ins saja sa cunvegnì sin in pe da tschains da 2 %. Da smesar quai cuntrafetschia a la buna fai. Da quai maini era la maioritad dal cussegl ed han laschà il tschains da 2 %.

La fatschenta va ussa enavos en la chombra pitschna.

RR novitads 11:00