Il Cussegl naziunal è vinavant cleramain per ina candidatura da la Svizra per il Cussegl da segirezza da l'ONU. Cun 125 cunter 56 vuschs, ed 8 abstenziuns ha il Cussegl naziunal refusà ina moziun da la Partida populara. Sustegnì quella ha l'entira fracziun da la PPS. Intgins commembers da l'Allianza dal Center èn s'abstegnids u han perfin sustegnì la pretensiun da la PPS. Tenor il Cussegl federal ed ina maioritad dal Cussegl naziunal èsi en l'interess da la Svizra da candidar per il Cussegl da segirezza.
Uss pli impurtant ch'insacura
Tenor il president da la Confederaziun Ignazio Cassis, saja uss anc pli impurtant da far part dal Cussegl da segirezza che pli baud. La Svizra saja la vusch da las minoritads e da cumpromiss. E la Svizra possia metter a disposiziun bleras cumpetenzas al Cussegl da segirezza.
In commembranza en il Cussegl da segirezza da l'ONU saja era cumpatibel cun la neutralitad da la Svizra. La neutralitad n'impedeschia betg la Svizra da defender sias valurs. In sez en il Cussegl da segirezza dettia a la Svizra la pussaivladad da s'engaschar per pasch e segirtad en in gremi cun influenza.
