Siglir tar il cuntegn

Header

cuntegn

Svizra Cussegl naziunal vul spargnar tar prestaziuns supplementaras

Curt e concis:

  • Il Cussegl naziunal na vul betg pajar prestaziuns supplementaras per il viver assistì.
  • Persunas che possedan pli che 100'000 francs na duain betg pli survegnir prestaziuns supplementaras.
  • L'import maximal per ils tschains da locaziun vegn augmentà minimalmain per persunas che vivan en citads.

Il Cussegl naziunal vul spargnar tar las prestaziuns supplementaras per persunas che retiran ina renta d’AVS ni d’invaliditad. En la debatta davart la refurma da las prestaziuns supplementaras ha la Chombra gronda fin ussa decidì differentas scursanidas.

Uschia ha il Cussegl naziunal refusà ina proposta da pajar prestaziuns supplementaras per il viver assistì. La finamira da questa proposta fiss stada da pussibilitar ad attempads d'abitar uschè ditg sco pussaivel en l'agen dachasa.

Naginas prestaziuns per persunas cun facultad

E spargnar vul il Cussegl naziunal er cun ina nova barriera da facultad. Tgi che posseda pli che 100'000 francs na duai betg pli survegnir prestaziuns supplementaras. Per che nagin na stoppia ir ord l'atgna abitaziun, na vegn la valur da questa betg resguardada. Vegn quella dentant vendida u laschada en ierta, ston las prestaziuns supplementaras vegnir pajadas enavos.

Adattà minimalmain il tschains per l'abitaziun

Adattaziuns minimalas hai da tar l'import per il tschains d'abitaziun: En l'avegnir duain persunas sulettas survegnir 100 francs dapli per il tschains da locaziun e pèrs maridads 200 francs dapli – quai dentant mo sch'ellas vivan en ina citad.

Oz survegnan persunas sulettas prestaziuns supplementaras da maximalmain 1'100 francs e pèrs 1'250 francs. Ina gronda part da las persunas na po però betg pajar il tschains per l'abitaziun cun questa summa. L'ultima giada che quests imports maximals èn vegnids adattads è stà il 2001.

Las prestaziuns supplementaras èn savens l'ultima rait d'agid sociala per retschaviders da rentas povers. La summa da las prestaziuns supplementaras è ils ultims onns sa dublegiada sin 4,4 milliardas per onn.

RR novitads 06:00

Artitgels legids il pli savens