L'agenda dals parlamentaris federals è durant la sessiun anc pli pulpida che uschiglio. La damaun in solver cun ils represchentants da l'industria d'electricitad, da mezdi in lunch cun ils lobbyists da las organisaziuns da la natira e la saira in afterwork-drink cun ils importaders d'autos.
E mintgatant datti era inscunters cun las regenzas chantunalas. Uschia era stersas saira el hotel Bellvue. Là è la regenza turitgaisa s'inscuntrada cun ses parlamentaris. Temas: la lescha davart la refurma da l'imposiziun da taglia sin interpresas III, il fond per las vias naziunalas ed il traffic en l’aglomeraziun sco era ils problems en il sectur da la sanadad.
Inscunter cun la regenza da Turitg…
Natiralmain ch'igl è vegnia fatg ina foto e mess quella sin il conto da Facebook dal chantun.
Gist quella foto chaschuna ussa per discussiuns en las raits socialas, ves’ins sin ella era la fatscha da la Cussegliera naziunala grischuna Magdalena Martullo-Blocher.
Sin Twitter vegn la foto gia taxada sco mussament che Turitg saja halt tuttina pli datiers ad ella ch'il Grischun. Gie ch'ella saja atgnamain ina politichera turitgaisa. Ha ella forsa emblidà tgi che ha elegì ella en Chasa federala?
Natiralmain betg, respunda la scheffa da la EMS Chemie.
Igl è cler, che jau sun la represchentanta dals Grischuns.
Mo tge ha ella lura gì da far tar l’inscunter da la regenza turitgaisa cun lur parlamentaris federals? Tgirar contacts e s’infurmar, di ella. “Jau sun vegnida envidada sco osp dal Grischun perquai ch’els han infurmà davart lur posiziun tar la refurma da l'imposiziun da taglia sin interpresas III e la situaziun da las bancas e las segiradas. Jau sun ella cumissiun da l’economia dal Cussegl naziunal ed era responsabla per quai dossier e perquai han els envidà mai.”
…però nagin inscunter cun la regenza grischuna
Tals inscunters na datti betg mo tranter ils elegi dal chantun Turitg. Era la regenza Grischuna s'inscuntra mintgamai avant la sessiun a Berna cun ils parlamentaris federals. Sco quai che la Chanzlia chantunala dal Grischun conferma, saja Magdalena Marullo dentant mai stada a quels inscunters.
Che quai saja uschia conferma ella. Enfin ussa haja dà dus inscunters cun la regenza grischuna. L’emprim saja stà gist suenter si‘elecziun. Lura saja ella dentant stada sin viadi da fatschenta en China. Ella haja era dumandà sch’i saja pussaivel da spustar il termin. Quai na saja deplorablamain betg stà pussaivel. E la segunda giada haja ella gì sesida da la cumissiun d’economia dal Cussegl naziunal nua ch’els hajan tractà la refurma da l'imposiziun da taglia sin interpresas III. Mo la proxima giada duessi funcziunar, empermetta ella.
Tuttina bler contact cun la regenza grischuna - via e-mail
Ella saja savens en contact cun la regenza grischuna, scrivi e-mails ni telefoneschi sch’i saja insatge. La regenza turitgaisa haja ella dil reminent vis per l’emprima giada stersas saira. Mo sco deputada a Berna saja era impurtant da s'inscuntrar cun represchentants d'auters chantuns. Tar il Gottard haja ella gì da far cun il Tessin ed l’Uri, en connex cun la refurma da l'imposiziun da taglia sin interpresas III haja ella da far savens cun ils chantuns da la Svizra franzosa ed uschia vinavant. I saja cler ch’ins haja qua era contacts. “Mo jau votesch lura adina per il Grischun. Gist sch’i va per la gulivaziun da finanzas ni per ils tschains d’aua. Là sun jau consequenta.”
Tge che vegni scrit dad ella en las raits socialas n’interesseschi ella betg uschè fitg. Ella haja ses maini e quel ditgi ella era. E la fin finala haja ella da far pli impurtant che da mirar tge che tschertins scrivian egl internet.