L'onn 2017 ha il sectur da sanadad custà en Svizra en total 82,5 milliardas francs. Quai èn 2,1 milliardas francs ubain 2,6% dapli che l'onn 2016. La relaziun tranter ils custs da sanadad ed il product naziunal brut è s'augmentada per 0,1 puncts sin 12,3% – communitgescha l'Uffizi federal da statistica vinavant.
L'augment dals custs è dentant sut la media da l'augment dals ultims 5 onns. Ils tschintg onns avant eran ils custs da sanadad en media creschids mintgamai per 3,4%.
13 francs dapli per persuna
Per mintga abitanta e mintga abitant en Svizra han ils custs da sanadad per il 2017 muntà en media ad 814 francs. Quai èn 13.- dapli ch'il 2016. Dals custs per persuna èn vegnids cuvrids:
- 292.- da la cassa da malsauns obligatorica
- 50.- dad assicuranzas socialas sco AVS, AI ed assicuranzas d'accident
- 29.- dad ulteriurs purtaders da la segirtad sociala
- 53.- dad assicuranzas supplementaras
- 147.- dal stadi
- 11.- entras ulteriuras finanziaziuns privatas
- 233.- da chasadas privatas
Sper las premias da l'assicuranza da malsauns e las impostas han las chasadas privatas pia pajà anc 233.- per persuna directamain vi dals custs da sanadad. Tar quels custs tutgan surtut prestaziuns per chasas da tgira, custs da dentist sco er la participaziun vi dals custs per tractaments ambulants e staziunars.
RR novitads 11:00