Il parlament a Berna mida fundamentalmain la finanziaziun dal sectur da sanadad. Cun eliminar la davosa differenza, ha il Cussegl dals chantuns fatg pronta la fatschenta per las votaziuns finalas. Quai suenter discussiuns ch'han duvrà en tut 14 onns.
Grazia al nov model da finanziaziun duai esser pussaivel da spargnar ina fin trais milliardas francs dals custs da sanadad. In ulteriur effect duess esser da pudair eliminar impuls nungiavischads per tractaments.
Integraziun da la tgira da lunga durada
L’ultim punct dispitaivel era stà sut tge premissas che la tgira da lunga durada duai vegnir integrada en la part unifitgada dals custs – questa integraziun è indispensabla per ils chantuns. Il cussegl dals chantuns aveva vulì fixar sco criteri unicamain in termin da set onns davent dal cumenzament dal project.
Il cussegl naziunal ha fatg in’ulteriura cundiziun ed è sa mess atras a la fin: Per prestaziuns da tgira ston ins avair tariffas che sa basan sin ina basa da datas e custs unifitgada e transparenta. E las tariffas ston cuvrir ils custs.
Associaziuns da persunal da tgira lantschà referendum
Prendì en mira il project cumplex da monissem aveva l’anteriura politicra da sanadad da l’Argovia e cussegliera naziunala Ruth Humbel dal center l’onn 2009. Pir l’onn 2019 è il project elavurà da la cumissiun responsabla dal Cussegl naziunal vegnì en il parlament. La vart dals aderents spetga da quai in potenzial da spargn considerabel.
Il project porta ina refurma fundamentala per finanziar las prestaziuns da la sanadad, numnadamain la finanziaziun da quellas or d’in maun. Oz vegnan pajads ils tractaments ambulants sulettamain da las cassas da malsauns, or dals daners da las premias. Prestaziuns staziunaras surpiglian per almain 55% ils chantuns. Il rest pajan las cassas.
Associaziuns dal persunal da tgira han lantschà ils dis passads in referendum. Il project saja fauss e privlus – per il persunal da tgira, per la qualitad dal provediment e per ils assicurads, ha scrit per exempel il VPOD.