En Svizra pudessan ils custs per ils fatgs d'asil crescher per il dubel. Quai mussan las novas prognosas da la Confederaziun.
Dumonda per 400 milliuns dapli
Per l'onn passà eran anc planisads 1,4 milliardas francs, per il 2018 saja quai però gia da far quint cun il dubel cun bunamain 2,4 milliardas, uschia il directur da l'administraziun federala da finanzas, Serge Gaillard envers SRF. Quai èn radund 400 milliuns dapli ch'anc communitgà il schaner. Il schef da finanzas quinta er per quest onn cun 40’000 requirents d'asil.
Credits supplementars cumpletteschan il budget da l’onn current cun expensas ed investiziuns inevitablas u urgentas che n’han betg pudì vegnir planisadas ad uras. Il credit supplementar I vegn mintgamai tractà dal parlament durant la sessiun da stad.
Svizra recepescha 1'500 fugitivs
La Svizra prenda si las proximas emnas 1’500 fugitivs, quai en il rom dal program da repartiziun da l'Uniun europeica. Sco quai ch'il secretari statal per migraziun Mario Gattiker ha ditg, sa participeschia la Svizra voluntarmain al program.
La Grezia e l'Italia decidian tge fugitivs che vegnian. La Svizra examineschia lura ils cas sut l'aspect da la segirezza. La realisaziun stoppia anc vegnir coordinada cun ils chantuns.
A medem temp trametta la Svizra enavos persunas en ils pajais europeics nua che quellas han gia dumandà asil, quai tenor la cunvegna da Dublin.
RR novitads 06:00 / 07:00