La moderatura da RTR Corina Schmed, sia collega Carla Norghauer (RSI) e ses dus collegas Sven Epiney (SRF) e Jean-Marc Richard (RTS) prendan las aspectaturas ed ils aspectaturs sin in viadi tras la notg.
Dasper plirs highlights da la citad da Losanna visitan las duas moderaturas ed ils dus moderaturs er in dals pli renumads e populars clubs da notg. Qua datti tranter auter in concert exclusiv da la gruppa Sens Unik che returna suenter onns puspè sin tribuna.
Corina dastga plinavant sa participar a la dumbraziun da selvaschina che vegn fatga mintg’onn durant ina notg. Cun ils guardiaselvaschina dal Surses e la camera termica va ella a la tschertga da tschiervs e chavriels.
Ella dastga plinavant accumpagnar ina tgirunza durant ses servetsch da notg sin la staziun intensiva dals uffants en l’ospital da Cuira. Tar questa partiziun tutga era la neonatologia, nua che pops e poppas che naschan memia baud vegnan tgirads.
E lura lavura Corina in’entira notg cun ils lavurers da la Viafier retica sin in plazzal da lavur spectacular tar il viaduct da Solis. La terz auta punt da viafier en Svizra che sto vegnir renovada. Parts da las lavurs pon be vegnir fatgas la notg.
L’emissiun dal 1. d’avust datti da vesair il venderdi, a las 20.10 sin SRF 1.
Davos las culissas
-
Bild 1 von 5. Bainvegni a Losanna. Las moderaturas ed ils moderaturs ad Ouchy, a la riva dal Lai da Genevra. Bildquelle: RTR.
-
Bild 2 von 5. Il sulegl va da rendì. Jean-Marc Richard (RTS) e Corina Schmed (RTR) sin las piramidas da Vidy a Losanna. Bildquelle: RTR.
-
Bild 3 von 5. En il club daventa la notg tar il di. Bildquelle: RTR.
-
Bild 4 von 5. Viva la Svizra! Carla Norghauer, Jean-Marc Richard, Corina Schmed e Sven Epiney. Bildquelle: RTR.
-
Bild 5 von 5. La levada dal sulegl al Lai da Genevra. Bildquelle: RTR.