Il pli savens va la violenza envers persunas d'instrucziun or dals geniturs. Quai mussa il studi che l'uniun tetgala da scolastas e scolasts ha laschà far. Er scolaras u scolars or da l'atgna classa sajan savens la funtauna da la violenza.
Persunas pertutgadas chattan per regla insatgi per relatar lur problems en confidenza. Per ordinari possian quellas dentant mo porscher in sustegn moral. L'uniun tetgala pretenda perquai in post da mediaziun independent. Plinavant duai dar purschidas nun-birocraticas da cussegliaziun e mediaziun. Latiers duai mintga scola elavurar concepts d'intervenziun e da crisa. Persunas d'instrucziun duain er vegnir instruidas en management da conflict u co ir enturn cun cybermobbing.
La suandanta retschertga mussa, ch'en blers lieus mancan instruments e mesiras concretas.
Il Grischun n'è betg sa participà a quest studi. Per Laura Lutz, la presidenta da l'Uniun da magistraglia grischuna è dentant cler, che la situaziun è sumeglianta en il chantun Grischun:
Betg dramatisar, betg bagatellisar
En il medem mument relativescha l'uniun dentant era. Ins na veglia betg dramatisar, dentant er betg bagatellisar. I na dettia betg relaziuns americanas. Cas gravants sco violenza sexuala, attatgas cun armas u blessuras sajan cas singuls. La violenza sa mussia plitost en furmas pli subtilas, sco offaisas, insultas ubain smanatschas. Er quellas furmas portian cun sai consequenzas ed ins stoppia prender serius ils cas.
