Radund in terz dals 8'499 requirents d'asil refusads che han profità da l'agid d'urgenza, eran dals pajais Eritrea, Etiopia, Algeria, Irac ed Afganistan. 70% eran umens, e 40% tranter 18 e 29 onns vegls. Quai scriva il Secretariat da stadi per la migraziun.
En media han las persunas retratg 137 dis agid d'urgenza, quai èn 15 dis dapli ch'anc il 2016. E 3'068 persunas valevan il 2017 sco talas che retiran dapi pli ditg l'agid, era quai munta in augment da passa in terz.
Tuttina èn il custs dals chantuns per l'agid d'urgenza sa reducids per 9%, sin anc 63,5 milliuns francs. La raschun è tenor il Secretariat da stadi per la migraziun il dumber da las persunas che profiteschan ch'è sa reducì. Vitiers sajan ils custs en media sa sbassads per in franc sin anc 52 francs.
RR novitads 18:00