Amnesty International, l'Agid da fugitivs svizzer ed autras organisaziuns caritativas han surdà a la regenza svizra lur uschè numnà appel da Dublin «Per ina Svizra che protegia ils dretgs d'uffants e da fugitivs vulnerabels». Passa 33'000 persunas e 200 organisaziuns han suttascrit l'appel.
La Svizra è il pajais ch'applitgescha il pli sever l'ordinaziun da Dublin, ed ha da tut ils pajais europeics tramess davent las pli bleras persunas. L’ordinaziun prevesa ch’en principi è quest pajais responsabel per la procedura d’asil, nua ch’il fugitiv ha dumandà per l’emprima giada per asil, u nua ch’el è arrivà per l’emprima giada sin terren da l’UE.
Sch’in fugitiv fa la dumonda d’asil en in auter pajais da Dublin, lura sto quel tenor ordinaziun vegnir tramess enavos en il stadi responsabel. Las organisaziuns crititgeschan che las autoritads svizras decidian sin quella basa da prender uffants ord scola e che tractaments medicinics ni psicologics vegnian simplamain interruts. Plirs uffants sajan era vegni separai da lur geniturs, quai che cuntrafetschia a la convenziun per ils dretgs da l’uffant da l'ONU.
Las passa 200 organisaziuns pretendan perquai da desister en talas situaziuns sin la repatriaziun. Quai per motivs umanitars. Lur acziun saja in appel a la sauna raschun, scrivan las organisaziuns.
RR novitads 11:00