Siglir tar il cuntegn

Svizra Damain immigrants en Svizra l’emprim mez onn

Ils emprims sis mais da quest onn èn 12% damain persunas immigradas en Svizra cumpareglià cun il medem temp da l’onn avant. Quai ha communitgà il Secretariat da stadi per la migraziun.

Duas scolastas cun dus uffants en ina canorta d'uffants immigrads.
Legenda: L’emprim mez onn èn 12% pli paucas persunas immigradas en Svizra. Keystone

Davent dal schaner enfin il zercladur 2017 èn 25’526 persunas immigradas en Svizra. L’onn 2016 da quai temp eran quai anc 12% dapli persunas. Surtut or dals pajais da l’Uniun europeica e da l’EFTA èn vegnidas damain persunas. Numnadamain 21,5% damain che l’onn avant.
Uschia sa sbassa il saldo da migraziun sin stgars 6’500 persunas en il segund quartal da quest onn. Uschè bass n’è el dapi il segund quartal dal 2005 betg pli stà.

Bun dus milliuns esters en Svizra

La fin da zercladur 2017 vivevan bun dus milliuns estras ed esters en Svizra. La mesadad da quellas persunas deriva dal stadis europeics Italia (15,6%), Germania (14,9%), Portugal (13,2%) e Frantscha (6,3%).

RR novitads 14:00