Cunzunt sa reducidas sajan las infecziuns tar l'allontanament dal begl tschorv e tar las operaziuns dal bypass per il magun. Quai mussian las cifras las pli novas da la perioda 2013-2014, sco l'Uniun naziunala per il svilup da la qualitad en ospitals e clinicas (ANQ) annunzia.
La retschertga ha cumpiglià passa 50’000 pazients en 153 ospitals e clinicas en Svizra. Da cumparegliar questas cifras cun l'exteriur saja però difficil, scriva ANQ. Quai pervi che la Svizra registreschia ils cas a moda pli rigurusa e perquai ch'ella fetschia quai er pli ditg che auters pajais. Uschia saja da declerar che las quotas svizras sajan per part pli autas cumpareglià cun l'exteriur.
Avant 3 onns ha l'Uniun naziunala per il svilup da la qualitad en ospitals e clinicas publitgà per l'emprima giada in raport davart infecziuns da plajas postoperativas. La finamira è da far attents ils responsabels cun questas cifras. Mintg'onn s'infecteschan millis da persunas en ospitals svizzes cun bacterias. Las consequenzas èn dapli temp en l'ospital, dapli medicaments, ulteriuras operaziuns u cunzunt la mort.
RR novitads 12:00