Siglir tar il cuntegn

Header

cuntegn

Svizra Damain lavur administrativa per las pendicularas

La Confederaziun vul distgargiar la branscha da las pendicularas cun adattar tschertas prescripziuns. Las mesiras na duain dentant betg periclitar tenor l’Uffizi federal da traffic l’aut nivel da segirezza.

L’Uffizi federal da traffic BAV fa actualmain in’emprima consultaziun nunuffiziala tar las gruppas interessadas. L’uffizi quinta da metter en vigur las midadas probablamain il 1. da fanadur dal 2017.

Las mesiras concretas

Tranter auter propona l’Uffizi federal da traffic da prolungar la durada da la concessiun per las pendicularas da 25 sin 40 onns. Plinavant duai esser pussaivel da far pitschnas midadas vi dals indrizs senza stuair dumandar in’autorisaziun. Scrudar duai era che la Confederaziun ha da renconuscher tschertas funcziuns sco il manader tecnic.

Era damain lavur a Berna

Questas midadas duessan reducir la lavur da las pendicularas, senza ch'il nivel da segirezza pateschia, scriva l'Uffizi federal da traffic BAV. Plinavant procurian las midadas era per respargns tar il persunal da la Confederaziun. Las mesiras fan part dal program federal da stabilisaziun 2017-2019.

RR novitads 11:00

Artitgels legids il pli savens