L'industria da tschigulatta svizra patescha pervi da la pandemia da corona. Dal schaner fin l'avust da quest onn èn las svieutas sa reducidas per 14,3%. L'associaziun da la branscha Chocosuisse tema che plazzas da lavur van a perder e pretenda che las regulaziuns che donnegian l'ambient economic vegnan reducidas.
Ils emprims otg mais da l'onn han tant la fatschenta en Svizra (minus 14,9%) sco er en l'exteriur (minus 13,8%) nudà ina reducziun da la svieuta, scriva Chocosuisse. Dal matg fin l'avust haja la branscha schizunt vendì 21,5% pli pauca tschigulatta ch'anc durant la medema perioda dal 2019.
Turists mancan
Il martgà intern cun normalmain bler turists haja patì spezialmain pervi dal coronavirus. El medem mument haja dentant era l'import da tschigulatta prendì tiers. Uschia sajan ils producents da tschigulatta dubel sut squitsch, uschia Chocosuisse.
Patì haja dentant era l'export. Era qua saja la svieuta sa reducida durant la stad marcant. E qua na possian er betg quintar a lunga vista cun in meglierament.
