Il Salun internaziunal d'automobils a Genevra è ì a fin la dumengia. Cumpareglià cun l'onn passà hajan els dumbrà 9% damain visitaders. En tut hajan 602'000 persunas visità l’exposiziun. Quai han communitgà ils organisaturs. Els avevan quintà cun radund 650'000 fin 700'000 visitaders. Tuttina fan els bilantscha positiva: L'interess dals visitaders saja stà fitg grond.
L'interess medial vi da l'exposiziun saja stà fitg grond: Var 10'000 represchentants da las medias ord l'entir mund hajan visità las 151 premieras mundialas ed europeicas e rapportà da quellas.
In success è l'exposiziun er stada en las raits socialas. Ils responsabels dal salun d'autos han registrà 5,8 milliuns visitaders sin Instagram, 154'000 fans sin Facebook e 345'000 tweets.
RR novitads 06:00