Geograficamain è Moutier gist al cunfin tar il Giura. Otg kilometers èn tranter il vitg da bunamain 9’000 abitants e la chapitala dal Giura, Delémont. Ils simpatisants dal Giura vesan quai sco punct per far la midada. Ins saja uschia pli datiers al centrum e speria sin pli bler sustegn che enfin ussa dal chantun Berna.Vitiers hajan ins la medema mentalitad e cunzunt il medem linguatg sco quels dal Giura.
Ils adversaris vesan quai in zic auter. Las empermischuns dal Giura dad investir ferm a Moutier na sajan anc betg propi garantidas. Els crajan plitost, ch’in grond e ferm chantun sco Berna fetschia meglier al vitg. Plinavant fiss era il futur da l'ospital a Moutier da metter en dumonda tar in midament tar il Giura. Ins vess uschia mo paucs kilometers in ord l’auter gist dus ospitals. Prioritad vess lura l'ospital a Delémont e quel a Moutier vegniss serrà, teman ils adversaris. Ord vista dal chantun Berna è l’ospital a Moutier giustifitgà cun quai ch'il proxim ospital è pli lunsch davent.
Dumengia ils 18-06-2017 vegn lura decidì en tge chantun che Moutier sa chatta en l'avegnir. Experts spetgan ina decisiun fitg stretga.
RR actualitad 07:00