Quatter da las grondas cassas da malsauns en Svizra vulan ensemen pajar enavos passa 300 milliuns francs als assicurads. Quai duaja capitar l’auter onn u via pajaments directs u en furma da rabats. Las cassas da malsauns Helsana, CSS, Groupe Mutuel ed Assura han confermà in rapport da la gasetta “Le Temps”.
Sco emprim duajan ils assicurads da l’Assura profitar. Quella paja enavos radund 30 milliuns francs las proximas emnas. Las ulteriuras cassas han dumandà l’Uffizi federal da sanadad d’astgar reducir lur reservas.
Tar la Helsana e la CSS duajan ils assicurads profitar da rabats tar las premias mensilas. La Helsana vul reducir las reservas per 70 milliuns francs e la CSS per 90 milliuns francs. La Groupe Mutuel ha dumandà il BAG per ina reducziun da 113 milliuns francs per reducir las premias dals assicurads.
Il BAG n'ha betg vulì s'exprimer davart il tema. El sto dentant anc approvar las dumondas da la s cassas da malsauns. Il Cussegl federal annunzia las novas premias a la fin da settember.