Siglir tar il cuntegn
Inhalt

Svizra Daniel Fässler n'ha nagin interess da candidar

Er il cusseglier naziunal dal chantun Appenzell Dadens da la PCD na vul betg succeder a Doris Leuthard en il Cussegl federal.

Purtret Daniel Fässler
Legenda: Er Fässler ch'è cusseglier naziunal e landamma dal chantun Appenzell Dadens vul betg candidar per la regenza federala. Keystone

El veglia cuntinuar cun sia professiun ed avair avunda temp per sia famiglia, ha communitgà Daniel Fässler. El saja dentant sa legrà ch'el saja vegnì considerà per il post. En las retschas da la partida cristiandemocratica ha enfin uss sulettamain il cusseglier dals chantuns Peter Hegglin annunzià ambiziuns.

Glindesdi aveva Ruth Humbel er gia ditg ch'ella na stettia betg a disposiziun per la successiun da Doris Leuthard. Ella è en buna cumpagnia. Er Gerhard Pfister il president dalla partida cristiandemocratica svizra, il cusseglier dals chantuns grischun Stefan Engler ed il cusseglier naziunal grischun Martin Candinas avevan gia communitgà da betg candidar.

RR novitads 09:00