280 pazients vid in apparat da respiraziun
Tenor Daniel Koch è quai in dumber enormamain aut per la Svizra. Pliras tschient persunas tgirian questas persunas che cumbattian per lur vita, uschia Koch. Naginas staziuns intensivas sajan il mument surchargiadas.
Il manader da la partiziun malsognas contagiusas dal BAG ha appellà a la populaziun svizra da vinavant sa tegnair vid las mesiras ordinadas da la Confederaziun.
Situaziun al cunfin è quieta
Las controllas als cunfins funcziunan senza problems, ha orientà Christian Bock, il directur da l’Administraziun federala da duana. El deplorescha dentant ch’i dettia anc adina glieud che veglia er uss anc far cumissiuns sur cunfin e ch’emprovian dad ir sur cunfin là, nua ch’il cunfin è serrà. Fin uss haja la guardia da cunfin refusà a 27’000 persunas l’entrada en il pajais. Il traffic d’autos al cunfin saja sa reducì per 78%.
Passa 15'000 dumondas da credit
Fin venderdi saira sajan 15’930 cunvegnas da credits vegnidas serradas giu, ha infurmà Marie-Gabrielle Ineichen-Fleisch, la secretaria da stadi dal SECO. L’interess per quests credits da liquiditad saja grond. La pagina d’internet specifica saja vegnida visitada 417'000 giadas ed ils formulars correspundents sajan vegnids chargiads giu radund 130'000 giadas.
Entant hajan en Svizra 59'000 manaschis dumandà il permis da pudair introducir lavur curta per total 760'000 persunas. Tenor il SECO èn quai 15% da tut las persunas occupadas. Ina tala procentuala n'haja la Svizra anc mai registrà, ha ditg Ineichen-Fleisch.
Acziun da sgular enavos Svizras e Svizzers
Johannes Matyassy, il directur da la direcziun consulara ha infurmà davart las stentas per pudair organisar sgols da return per burgais svizzers en la patria. Fin ussa haja dà tschintg sgols ord l’America latina ed ord l’Africa che hajan purtà enavos en total 1'400 persunas. Per dumengia saja previs in sgol da return ord l’Algeria ed ord il Chile. Er sgols ord l’Asia ed ord l’Oceania sajan planisads, dentant na dettia anc nagins termins exacts.
Dapli fatgs, infurmaziuns ed istorgias chattais qua.