- Daniel Koch da l'Uffizi federal da sanadad publica ha danovamain accentuà l'impurtanza da las mesiras da la Confederaziun. Sin la Svizra spetgia ina gronda unda d'infecziuns. Persunas vulnerablas stoppian vegnir protegidas – i giaja per il surviver.
- Las Viafiers federalas han registrà tant en il traffic a distanza sco er en il traffic regiunal in regress fin a 80%.
- La Svizra sto quintar cun ina recessiun il 2020. Il SECO quinta cun ina reducziun da -1,5 % sin la creschientscha dal product interiur brut. Quai en consequenza dal svilup en l'interiur ed er en l'exteriur.
- L'Armada svizra stritga il mument tuttas vacanzas. Militars restan en uffizi.
Sin la Svizra spetga in'unda d'infecziuns gronda, ha ditg Daniel Koch da l'Uffizi federal da sanadad. La situaziun saja fitg seriusa. Il Tessin vegnia bainprest als cunfins. Tuttas persunas stoppian uss sa tegnair vid las mesiras da la Confederaziun – l'unda da corona stoppia vegnir franada per proteger gruppas vulnerablas. «Igl è uss l'ultima schanza per franar la derasaziun», ha ditg Koch.
Plinavant sa sviluppeschia la situaziun en Svizra uschia, ch'ins na possia betg pli transportar pazientas e pazients dad in chantun a l'auter, sch'in chantun vegnia al cunfin. Ils plazs da tgira intensiva sajan restrenschids, la mortalitad gronda.
Tenor Koch stoppian ins sa concentrar d'avair pli paucs pazients, curar ils pazients na saja betg ina schliaziun. En il mument dettia anc 160 plazs da tgira intensiva libers – 440 sajan gia occupads.
Regress en il traffic public
Il traffic public senta in regress tant en il traffic regiunal sco er en il traffic a distanza da 80%. Radund 10 fin 30% dals collavuraturs tar la Viafiers federalas, na possian il mument betg engaschar. U perquai ch'ils collavuraturs veglian proteger sa sez, hajan sintoms u stoppian guardar d'uffants.
Tar ils bigliets emprovan las Viafiers federalas dad esser culantas. Bigliets possian vegnir restituids, ha ditg Andreas Meyer, il CEO da la SBB. Ins appelleschia dentant als clients da betg ir al spurtegl. A partir dal venderdi vegnia a dar ina pagina d'internet speziala per dar enavos bigliets.
Las Viafiers federalas han modifitgà la gievgia l'urari. Tenor Meyer sa tracti da la pli gronda midada en l'istorgia da la rait da viafier.
Svizra sto quintar cun ina recessiun
L'economia svizra spetga ina recessiun. Il SECO quinta cun ina reducziun da -1,5 % sin la creschientscha dal product interiur brut. Quai ha ditg Eric Scheidegger, il manader da la direcziun per politica economica SECO. En consequenza al svilup dal coronavirus en Svizra e l'exteriur stettia l'economia en il mument airi. En vista a la malsegirezza saja il franc svizzer daventà pli ferm. Quant ditg ch'il virus vegnia anc ad influenzar la conjunctura na possian ins anc betg dir – la malsegirezza tar prognosas saja gronda.