A Muri en il chantun Argovia hai dà gliendisdi passa 54millimeters plievgia. Latiers hai buffà ferm. Quai communitgescha SRF Meteo. En l’Emmental, en l’Argovia Sura sco er en autras regiun da la Bassa ha quai dà 70 enfin 80 annunzias da donns. En l'Argovia èn vegnids innundads plirs tschalers e garaschas.
L’aura sa quietescha
Dapi sonda dominescha en Svizra aura stitga e chauda che porta adina puspè urizis ed uradis. Gia la fin d’emna avevan urizis chaschunà gronds donns en plirs chantuns. Ils pli gronds a Zofingen en il chantun Argovia. Davent da mardis quinta SRF Meteo che l’aura sa quieteschi in zic.
800 cas tar l'assicuranza cunter tempesa
Suenter las grevas malauras dals davos dis quinta l’assicuranza cunter tempesta cun radund 800 annunzias da donn tar culturas agriculas. Tenor emprimas calculaziuns muntan ils donns a radund 4 milliuns francs. Dasper ers sajan er vignas e plantaschas da puma e legums vegnidas donnegiadas, communitgescha l’assicuranza. Cunzunt pertutgads sajan parts dal chantun Vad, la regiun dal Lai da Bienna e la Planira Bernaisa.
RR novitads 09:00