Svizra - Danovamain vegn cusseglià da laschar virolar cunter FSME
Las zeccas sa derasan pli e pli fitg en l'entira Svizra. L'onn passà èn 377 cas da FSME vegnids reportads – in nov record. Uschia è la Confederaziun sa decidida da recumandar la virola en l'entira Svizra cun excepziun dals chantuns Genevra e Tessin.
Questa virola vegn recumandada perquai ch'i dat nagina pussaivladad da tractar FSME, quella malsogna che po donnegiar grevamain il sistem da la gnerva.
Cunzunt persunas ch'èn savens giuadora en il liber duajan sa proteger encunter il virus da FSME. La virola vegn plinavant cussegliada a tut ils creschids ed uffants davent da la vegliadetgna da sis onns.
