Siglir tar il cuntegn

Header

cuntegn

Svizra Danunder vegn l'art en nos museums?

En l'avegnir pon museums en Svizra laschar examinar sche las ovras d’art en lur museum è art engulà dals naziunalsocialists. La Confederaziun metta a disposiziun dus milliuns francs per talas examinaziuns.

Quest sustegn ha la Confederaziun fixà en la missiva da cultura per ils onns 2016 enfin 2020. L'uffizi federal da cultura ha preschentà co els vulan realisar questa missiva ch'il parlament ha approvà la stad passada. Uschia duain questas examinaziuns esser in dals puncts centrals ils proxims 4 onns.

Novaziuns dat i dentant er tar l'instrucziun musicala e la promoziun da film e da ediziuns. En in pajais pluriling sco la Svizra gioghia la cultura ina rolla eminenta, è Isabelle Chassot, la directura da l'Uffizi federal da cultura persvasa. Quai betg mo tar la convivenza, mabain era sco instrument per facilitar la chapientscha vicendaivla.

audio
Messadi da cultura
ord RTR Audio dals 25.01.2016.
laschar ir. Durada: 3 minutas 34 Secundas.

Ina chaussa dal cor

“La Svizra è ina naziun fundada sin la voluntad politica. I è perquai impurtant d'enconuscher ils auters. Per mai èsi ina chaussa dal cor che nus pudain era contribuir a quai cun la cultura.”

Il rom per quella lavur furma il messadi da cultura per ils onns 2016 enfin 2020 ch'il parlament ha approvà la stad passada e ch’è dotà cun 1,13 milliardas francs.

Chassot preschenta quatter accents per ils proxims onns

  • Museums duain survegnir sustegn finanzial per sclerir la derivanza d'ovras d'art nua ch'i dat il suspect ch'i sa tracti d'art engulà durant il temps dil naziunalsocialissem. Exempel prominent è qua il museum d'art da Berna che intercurescha il mument la derivanza da la collecziun da Gurlitt ch'il museum ha ertà.
  • Tar il film duain las lavurs da filmar sco era las co-producziuns en Svizra vegnir sustegnidas. Quai per rinforzar l'industria da film indigena.
  • Il program "Giuventetgna e musica" sustegn, tenor l'exempel da "Giuventetgna e sport", la furmaziun musicala da uschè bleras giuvnas e giuvens sco pussaivel. Quai cun curs e champs da musica e la scolaziun da mussadras e mussaders. Per Isabelle Chassot èsi en quest connex dentant er impurtant da pudair promover ils talents. “Quai faschain nus gia oz cun las concurrenzas naziunalas. En il program vulain nus dentant ina secziun speziala per quels giuvens talents. Per cuntanscher quai duvrain nus l’agid da las associaziuns e las scolas da musica. Els ston selecziunar ils talents.” E da vart da las uniuns ed associaziuns saja l'interess gronds, conferma Chassot. “Ellas vesan la schanza che nus avain ussa da lantschar in program dal qual nus pudain dir en intgins onns, sco tar il program giuventetgna e sport, che grazia a quest program èn s’interessads bleras giuvnas e blers giuvens per la musica.”
  • Dapli interess duai era dar per la litteratura svizra. I duai dar programs per promover la lectura tar uffants e giuvenils. Ultra da quai duain era las chasas edituras survegnir sustegn finanzial. La plurilinguitad da la Svizra, la digitalisaziun ed il ferm franc svizzer sajan grondas sfidas per las chasas edituras. Buc pudair profitar da quellas novas contribuziuns duai tenor Chassot la "Chasa editura Rumantscha". Lezza survegni gia daners via las contribuziuns per la promoziun dal rumantsch.

Chasa editura Rumantscha na profitescha betg

Da questas novas contribuziuns na possia la "Chasa editura Rumantscha" betg profitar, ha ditg Chassot. Lezza survegni gia daners via contribuziuns per la promoziun dal rumantsch.

“Ella vegn a survegnir vinavant daners en il rom da la lescha da linguatgs e quai è fitg impurtant. I è era impurtant da far enconuschent ils auturs rumantschs en tut il pajais.”

Intgins auturs, sco per exempel Leo Tuor ubain Arno Camenisch, hajan gia chattà in suttetg tar ina chasa editura ordaifer il territori rumantsch. Ussa saja l'incumbensa da la Pro Helvezia da mirar che era las ovras dad autras auturas ed auters auturs vegnan translatadas.

Artitgels legids il pli savens