Siglir tar il cuntegn

Header

cuntegn

Dapi ils 12 da december Ura da polizia 19:00 en l'entira Svizra

Tar las ustarias resta il Cussegl federal dir: Ellas ston serrar las 19:00. Persuenter dastgan ins s'entupar cun 10 persunas las festas da Nadal - mesemna vuleva il Cussegl federal anc reducir il dumber sin tschintg persunas. Il Grischun ha definì atgnas reglas che valan fin ils 17 da december.

Il Cussegl federal veglia chattar la via per dumagnar la pandemia e tuttina pudair viver, uschia ha il minister da sanadad declerà las novas decisiuns.

E quai vala per l’entira Svizra:

  • Ustarias, bars, stizuns, fieras, museums, bibliotecas ed indriz da sport e da temp liber ston serrar las 19:00.
  • I vala era l'obligaziun da serrar la dumengia – cun excepziun dad ustarias e bars che dastgan avrir la dumengia.
  • Ils 24 da december e da Silvester vala l’ura da polizia pir a partir da 01:00.
  • Chantuns cun bunas cifras epidemiologicas dastgan prolungar l’ura da polizia fin las 23:00. Cundiziun è dentant che la valur da reproducziun è durant 7 dis sut 1. La valur da reproducziun inditgescha a quantas ulteriuras persunas ch'ina persuna infectada dat vinavant il virus.
  • Occurrenzas publicas èn scumandadas – cun excepziun da festas religiusas (cun maximalmain 50 persunas).
  • Per inscunters privats vala vinavant la regla da maximalmain 10 persunas, inclusivamain uffants.
  • L'agid per l'economia vegn schlargià: Per cas da direzza èn a disposiziun supplementarmain 1,5 milliardas francs.

Questas mesiras valan a partir da damaun ils 12 da december e duran fin ils 22 da schaner 2021.

Il chantun Grischun ha gia decis avant in’emna da serrar las ustarias enfin ils 17 da december. Quai vul dir tenor stan actual che las mesiras pli rigurusas valan per il Grischun enfin lura e silsuenter valan las reglas unifitgadas per l’entira Svizra.

video
Il Cussegl federal ha ordinà ulteriuras mesiras per la Svizra
Or da Telesguard dals 11.12.2020.
laschar ir

Ses arguments ha il Cussegl federal preschentà oz a Berna. Qua in ticker per leger pass per pass la conferenza da medias:

Il ticker è a fin

  • 15:25

    La conferenza da medias è a fin

    Il Cussegl federal ha decis novas reglas che valan a partir da mesanotg. Uschia datti ina ura da polizia tar ustarias, fieras, stizuns etc. da las 19:00. Quai vala per chantuns che han ina cifra da reproducziun da passa 1. Quels ch'èn sut dastgan laschar avert ustarias e indriz da temp liber enfin las 23:00. Plinavant èn occurenzas scumandadas, uschia stat la cultura vinavant airi.

  • 15:22

    Daco vala ina ura da polizia da las 19:00?

    La finamira saja da reducir enfin Nadal las cifras. Ina mesira saja perquai da desister d'inscunter en ustarias, bars etc. La situaziun saja bain difficila per tuts, i dettia dentant nagina alternativa che sa tegnair vi da quellas reglas, uschia Berset. Las perspectivas per l'onn proxim sajan pli empermettentas, emprova il minister da sanadad da far curaschi.

  • 15:12

    Chantuns cun ina cifra da reproducziun sut 1

    Patrick Mathys dal BAG ha anc ina giada precisà tge chantuns ch'han ils ultims 7 dis gì ina cifra da reproducziun sut 1, quai èn:

    • Friburg, Genevra, Giura, Vallais, Vad, Neuschatel, Sursilvania
  • 15:09

    Recumondaziun da homeoffice

    Da lavurar davent da chasa en il homeoffice saja anc adina ina recumondaziun. Il mument desista il Cussegl federal da cumandar in homeoffice.

  • 15:05

    Grondas perditas en la gastronomia

    La gastronomia fetschia ina gronda part da la svieuta la saira. Perquai quinta il minister da finanzas cun ina perdita da svieuta tar la gastronomia da 600-800 milliuns. Quai per ils mais da december e schaner.

  • 15:03

    10 persunas èn il rom privat

    Enfin uss n'hajan ins betg constatà ch'inscunters sa spostian en il rom privat e chaschunian in augment da las infecziuns, uschia Simonetta Sommaruga. Gist en il temp avant ils dis da festa haja il Cussegl federal betg vulì restrenscher memia fitg ils contacts. Tuttina valia la recumondaziun da betg s'inscuntrar cun persunas ord pli che dus perchasas.

  • 14:57

    Debits da milliardas

    Cun la pandemia da corona crescha il culm da debits da la Svizra. Ueli Maurer quinta cun daquai da 25-30 milliardas debits, quai saja dentant be ina stimaziun.

  • 14:54

    Proximas decisiuns en in'emna?

    Il Cussegl federal ha annunzià da vulair reponderar las mesiras en in’emna, ils 18 da december. Il minister da sanadad na vul dentant anc betg tradir co quai succeda precis. Quai saja anc avert, uschia la resposta sin ina dumonda d’in schurnalist.

  • 14:53

    30'000 tests a di

    Il mument detti naginas limitas da testar, declera Patrick Mathys dil BAG. Il mument fetschia la Svizra bun 30'000 tests a di. Quella capacitad poss'ins probabel augmentar.

  • 14:52

    Datti limitas finanzialas?

    Anc ina giada prenda il Cussegl federal enta maun blers daners, en tut 1,5 milliardas. In schurnalist vul saver co quai saja pussaivel. Ueli Maurer, il minister da finanzas respunda che ils daners duvrads e mess a disposiziun enfin uss sajan gia damemia. La Svizra fetschia dentant vinavant debits sch'i saja necessari.

  • 14:50

    Activitads culturalas

    In schurnalist vul savair dapli davart las reglas per activitads culturalas. Alain Berset declera che teaters, kinos etc dastgian avair avert enfin las 19:00. Occurenzas culturalas n'hajan dentnat anc adina betg lieu. Berset accentuescha che la cultura saja impurtanta e manchia fitg il mument. I vegnia dentant a dar agids per persunas che lavuran en il champ da cultura.

  • 14:48

    Festas religiusas

    Festas religiusas duain esser pussaivlas da Nadal, accentuescha Alain Berset. I valia dentant da resguardar concepts da protecziun. La cifra da 50 persunas saja in maximum – en baselgias pli pitschnas n’hajan probabel betg uschè bleras persunas plaz.

  • 14:45

    Cifra da reproducziun en Svizra

    Actualmain saja la cifra da reproducziun en Svizra sur 1, quai ha ditg Alain Berset. La cifra da reproducziun chaschuna bleras dumondas tar schurnalistas e schurnalists. Quella cifra decida la finala sche manaschis da gastro dastgan laschar avert enfin las 19:00 ubain las 23:00.

  • 14:27

    Ura da polizia cun excepziuns

    Per ils dis da festa da Nadal e Silvester vala ina excepziun da l'ura da polizia. Lura dastga la gastronomia avair avert enfin la notg da l'ina.

  • 14:25

    Consultaziun e posiziun dals chantuns

    Ina gronda part dals chantuns haja reconuschì che la situaziun saja il mument delicata. Il Cussegl federal saja responsabel per la sanadad publica, perquai hajan els stuì agir. Plinavant aschunta Simonetta Sommaruga ch'intgins chantuns sajan leds ch'il Cussegl federal intervegni ussa.

  • 14:22

    Svizra romanda cun cifra da reproducziun sut 1

    Sin ina dumonda en connex cun la cifra da reproducziun declera il cusseglier federal Alain Berset ch'ils chantuns da la Svizra romanda (senza chantun Berna) hajan actualmain ina cifra da reproducziun sut 1. Tut tschels chantuns han ina mendra situaziun epidemiologica cun ina cifra da reproducziun da passa 1.

  • 14:20

    Ussa pon schurnalistas e schurnalists tschentar dumondas

  • 14:19

    1,5 milliardas dapli

    L’economia survegn dapli agid: Il program per cas da direzza vegn auzà per 1,5 milliardas francs. Da quai pajan Confederaziun e chantuns communablamain 750 milliuns francs e 750 milliuns francs vul la Confederaziun pajar suletta, per sustegnar chantuns ch’èn pertutgads fitg da Covid-19. Uschia ha declerà il minister da finanzas Ueli Maurer.

    video
    Maurer: «Il pachet da sustegn vegn augmentà per 1500 milliuns»
    Or da News-Clip dals 11.12.2020.
    laschar ir
  • 14:16

    Morder tras l'enviern

    La situaziun saja spinusa il mument. Ussa vali quai da tegnair la dira, uschia Berset. Ins saja avisà che tuts prendian resguard enfin che la vaccinaziun è qua. I dovria dentant anc in zic pazienzia.

  • 14:14

    Pauc contacts - 10 persunas en il rom privat

    Il Cussegl federal appelescha da reducir ils contacts. Gia in contact dapli possia tut tenor auzar la cifra da reproducziun d'in chantun. Uschia saja impurtant d'avair uschè paucs contact sco pussaivel. Cuntrari a la proposta en la consultaziun resta la Confederaziun tar la regla da 10 persunas en il rom privat.

RTR novitads 14:00

Artitgels legids il pli savens

Scrollar a sanestra Scrollar a dretga