SP: Per la PS è il na a l’iniziativa ina schanza manchentada. Perquai che la situaziun insupportabla sin il martgà d’abitaziuns cuntinueschia betg, vegnia la partida a rinforzar lur stentas. Tranter auter stoppia ils tschains da locaziun sin basa dals custs vegnir controllads meglier. Il gea en bleras citads da la Svizra mussia che bleras persunas veglian dapli abitaziuns pajablas. Las autoritads da las citads stoppian uss agir.
VERDS: Er ils Verds deploreschan il na a l’iniziativa. Per la partida è dentant cler; il gea en las citads e l’aglomeraziun mussia ch’il squitsch politic vinavant grond. La partida vegnia uss a s’engaschar per controllas tar ils tschains da locaziun e la protecziun da disditgas.
PPS: La Partida populara Svizra sa legra che questa «soluziun fictiva» è giud maisa. L’iniziativa avessi betg schlià problems – mabain sulettamain chaschunà ina naziunalisaziun dal martgà d’abitaziuns e dapli birocrazia. Il problem sa lascha be schliar sin ina moda e maniera: entras ina migraziun moderada.
PLD: La populaziun saja tenor la PLD s’exprimida oz cleramain encunter l’iniziativa socialistica da l’associaziun da locataris. Il stadi na dovria betg quotas per abitaziuns d’util public en l’entir pajais. Enstagl survegnia il Fonds de Roulement uss il sustegn necessari.
PCD: La PCD è cuntenta che questa iniziativa «stravagada e nunnecessaria» è vegnida refusada. Il NA saja ina sditga ad ina politica d’abitaziuns centralistica, arbitrara e ristganta. Las pretensiuns da l’iniziativa avessan cuntrafatg al federalissem e sulettamain stgaffì problems. En il futur stoppia bain dar mesiras, quellas stoppian dentant las citads ed ils chantuns sez decider.
RTR novitads 17:00