La finamira da las scolas dal di en ils emprims dus onns da scola fiss d’integrar meglier uffants da linguatg ester, promover l’egualitad da las schanzas e augmentar las prestaziuns en scola. In studi da l’universitad da Berna ch’il Fond naziunal svizzer ha publitgà vegn uss a la conclusiun che quella finamira na vegn betg cuntanschida.
En general na mussan ils uffants en scolas dal di betg meglras prestaziuns en scola che uffants senza tgira dal di. Il studi mussa sulet in augment tar las prestaziuns en matematica tar uffants ord relaziuns povras ni cun pauca scolaziun.
Naginas differenzas en il svilup social
Il studi ha era examinà il svilup social ed emoziunal dals uffants. Tar il cumportament social giavischà n’han ils scienzads medemamain betg chattà ina differenza tranter ils uffants cun scola dal di e quels senza.
Dapli accumpagnament che furmaziun
La qualitad pedagogica da las scolas dal di saja s’augmentada ils ultims diesch onns da mediocra sin buna qualitad. Puncts principals da las structuras sajan dentant anc adina l’agid tar ils pensums, il gentar e la marenda. Activitads libras hajan ina gronda impurtanza. Activitads pedagogicas sco per exempel en lingua u roms da MINT dettia quai dentant be paucas. Il facit dal studi è perquai che las scolas dal di focusseschian surtut sin l’accumpagnament e betg sin la furmaziun.
RR novitads 10:00