En quatter da diesch cas han las attatgas da cyber er consequenzas finanzialas per las victimas. La retschertga mussa vinavant, che tar in terz da tut las attatgas èn vegnidas enguladas e publitgadas infurmaziuns confidenzialas ed in quart dals pertutgads han gì da cumbatter cun donns da reputaziun.
Novs trends
Tenor la KPMG dettia dus novs trends. D’ina vart sajan las attatgas pli spezialisadas che pli baud. Da l’autra vart observian els, ch’ils attatgaders maldovrian adina dapli computers per generar munaidas digitalas sco bitcoins. Enstagl da bloccar il computer infizà e pretender daners per puspè dar liber las datas engolian quels criminals la prestaziun dal computer. Quai capitia savens senza ch’il possessur sentia propi quai.
RR novitads 17:00