Siglir tar il cuntegn
cuntegn

Svizra Dapli colliaziuns per Turitg e la Svizra Orientala

Per il Grischun na mida l'urari 2019 da las Viafiers federalas betg bler.

Midadas da l'urari per paucas minutas n'èn betg resguardadas (funtauna: Uffizi d'energia e traffic GR).

Cun la midada da l’urari ils 9 da december circuleschan durant ils temps cun blers passagiers, pia ils lavurdis la damaun e la saira, enfin quatter trens da traffic a gronda distanza tranter Son Gagl e Turitg ed il cuntrari.

Era en il traffic regiunal en l’aglomeraziun da Turitg ed en la Svizra Orientala vegn la purschida meglierada. La Svizra Centrala profitescha da nov dad ina colliaziun directa da Lucerna via Turitg a Winterthur.

Era l'auter onn disturbis tras plazzals da bajegiar

La midada da l’urari da dumengia dals 9 da december 2018 e dentant era marcada da midadas temporaras. La raschun èn ils plazzals da bajegiar, nua ch’ils trajects da la SBB vegnan sanads ni amplifitgads.

Il pli grond plazzal pertutga la sanaziun e cumplettaziun sin dus binaris da la lingia da tren a la costa ost dal lai da Zug. Tranter la stad 2019 enfin la fin dal 2020 ston perquai tut ils trens vegnir manads via Rotkreuz, respectivamain via la lingia da tren al vest dal lai da Zug. I saja da quintar cun ina prolungaziun dal temps da viadi da enfin 15 minutas sin la lingia Basilea – tunnel da basa dal Gottard – Chiasso.

Grischun na profitescha strusch

Tranter Cuira e Turitg na mida betg la massa. Ina pitschna midada datti tar l’IC3. Quel circulescha durant la stagiun da sport d’enviern (09-02 enfin 02-03-2019) era la sonda a las 17:39 uras davent da Cuira.

Ed l’IR13 circulescha da nov da Turitg via Son Gagl a Cuira. Tenor la SBB vegn quest curs mannà per gronda part cun ils novs trens Dosto da Bombardier.

RR actualitad 12:00