Il cussegl federal po dar ora quest onn supplementarmain 50 milliuns francs per l'agid umanitar en Siria. La delegaziun da finanzas federala ha concedì in pajament anticipà da 31 milliuns francs.
Quai communitgeschan ils servetschs dal parlament. Il cussegl federal aveva proponì da dar quests daners per augmentar l'engaschi umanitar svizzer. Ils daners vegnan dads a la Crusch cotschna internaziunala ed ad organisaziuns da l'ONU. La delegaziun da finanzas renconuscha l'urgenza da quest credit supplementar era perquai che l'enviern stat avant porta.
