Dapli daners per radios e televisiuns privats

Las staziuns da radio e televisiun privatas duajan survegnir dapli daners da las taxas da radio e televisun. Da quest avis è il Cussegl dals chantuns. Gia avant era il Cussegl naziunal s’exprimì tuttina.

Normalmain discurrin nus sur da la politica, ma per il mument discurra la politica sur da nus: Sur da las medias en Svizra. Suenter la debatta davart l’iniziativa «No Billag» che na vegn betg sustegnida dal parlament, ha il Cussegl dals chantuns tractà diversas moziuns pertutgond la lescha da radio e da televisiun. Previs è che la lescha vegn preschentada proxim onn.

Il parlament vul che staziuns da radio e televisiun privatas survegnan dapli daners ord la cassa da la Billag. Da 5% duai l’import vegnir augmentà sin 6%. Vul dir, da 67.5 milliuns sin 80 milliuns. Cun quella decisiun dat il parlament la lezia al cussegl federal dad adattar la lescha da radio e televisiun. Tenor il parlament duai quest midament vegnir fatg il pli svelt pussaivel.

Cun quai vul la politica promover emetturs da radio e televisiun regiunals, respectiv las novitads da las regiuns. Per las medias electronicas privatas saja quai quasi impussibel da surviver senza las contribuziuns, argumentescha il parlament. Uschia vul il parlament dar la pussaivladad als privats da porscher ina buna qualitad da novitads localas.

Sbassar la Billag

La nova lescha da radio e da televisiun ch'avess dad esser elavurada proxim onn, prevesa che nus stuain pajar pli pauc taxas per radio e televisiun en avegnir. La presidenta da la confederaziun e ministra da medias Doris Leuthard ha ditg en la debatta, che las contribuziuns per radio e televisiun vegnian a muntar en avegnir cleramain sut 400 francs.

Ina tala moziun ha il Cussegl dals chantuns er gì oz sin il program. Perquai che la lescha vegn adattada n’han els però gnanc pli discutà e cun quai è la moziun liquidada per la chombra pitschna.

Reglas per la cooperaziun per la SSR

Reglas per la collavuraziun da la SRG cun autras medias ed autras firmas duain vegnir scrittas en la lescha, pretenda il Cussegl dals chantuns. Els vulan che la SSR na duai betg esser memia pussanta ed indeblir cun quai las medias privatas. En tge direcziun che quellas reglas duain ir, n'è anc betg dal tut cler. Sco proxim tracta il cussegl naziunal la moziun.

RR novitads 12:00