Siglir tar il cuntegn
cuntegn

Svizra Dapli discriminaziun da vegliadetgna che sexissem u rassissem

Tenor il studi dal manader da la scol'auta per lavur sociala a l'universitad da Friburg, han 28% da las persunas dumandadas inditgà d'avair fatg l'onn passà l'experientscha cun discriminaziun da vegliadetgna, da sexissem han discurrì 22% e da rassissem 12%.

Purtret d'in senior cun in rispli enta maun.
Legenda: Discriminaziun da vegliadetgna datti pli savens che sexissem u rassissem. Keystone

En spezial en il sectur da la sanadad han bunamain in terz da las persunas sur 70 onns inditgà d'esser stads tractads a moda malgista pervi da lur vegliadetgna. Raschuns per la discriminaziun dettia plirs. En cumparegliaziun cun sexissem e rassissem na dettia per la discriminaziun e stigmatisaziun da persunas pli veglias nagina lescha che scumondia quai. Gist sch'i giaja per custs da sanadad vegnia mussà cun il det sin ils pli vegls. Plinavant possian giuvens er vesair la generaziun pli veglia sco privel per lur rentas.

Perscrutaziun per program da sensibilisar

Il manader da la scol'auta per lavur sociala a l'universitad da Friburg vul uss examinar las raschuns per il fenomen. El vul perscrutar sch'i fa senn da sviluppar in program da sensibilisar uffants per il tema da discriminaziun en la vegliadetgna.

La lavur cun uffants saja impurtanta, damai ch'uffants sviluppeschian stereotips gia a partir da 4-5 onns. Tschertas persunas tendeschian per exempel da tralaschar lur sanadad. Els èn da l'avis ch'igl è normal d'esser malsaun a partir d'ina tscherta vegliadetgna.

RR novitads 14:00