Siglir tar il cuntegn

Header

cuntegn

Svizra Dapli dretgs per passagiers svizzers

Tar retards da dapli ch’ina ura duain las interpresas da transport rembursar almain 25% dal bigliet.

Sch’il tren ha retard u sch’il bus na po betg charrar perquai ch’ina bova blochescha la via duain ils passagiers survegnir in’indemnisaziun. Quai propona il Cussegl federal ed ha tramess en consultaziun ina midada da l’ordinaziun correspundenta.

Dretgs da passagiers sco en l'UE

Uschia duain ils dretgs dals passagiers en Svizra vegnir adattads a las regulaziuns da l'Uniun europeica UE:

  • En cas da retards da dapli ch'ina ura duain ils passagiers avair il dretg sin in'indemnisaziun dad almain in quart dal pretsch dal bigliet.
  • Datti in retard da dapli che duas uras vegn rembursada almain la mesadad dals custs dal bigliet.
  • N’èsi betg pussaivel da cuntinuar il viadi e turna il passagier a chasa ha el dretg da survegnir enavos ils custs da l’entir bigliet.

Meglra infurmaziun

Las interpresas da transport èn obligadas da pajar l'indemnisaziun entaifer 30 dis. Quai pon ellas far cun daners ni era cun bons da viadi. Tut quai vala dentant mo per indemnisaziuns d’almain diesch francs.

Sper quai ston las interpresas da transport era infurmar meglier ils passagiers en cas da retards ni interrupziuns ed i duai esser pli simpel da transportar l'agen velo en ils trens u bus.

Tenor il Cussegl federal van las disposiziuns novas en vigur en in onn.

RR novitads 12:00

Artitgels legids il pli savens