Mintga di chattan radund 350 uffants e giuvenils sustegn tar il numer da cussegliaziun ed agid 147. Adina pli savens stattan ils contacts en connex cun problems grevs. Uschia èn il 2017 29,1% dals contacts cun il numer 147 stads en connex cun crisas persunalas e suicid. Il 2009 stevan anc 10,9% en quest connex.
La raschun para dad esser squitsch e stress. Cun la campagna «Pli pauc squitsch. Dapli uffant» prova la Pro Juventute perquai dapi l'onn passà da far frunt al problem.
Pli paucas dumondas tar sexualitad ed amur
Cuntrari al tema suicid, è la sexualitad e l'amur in tema, cun quel ch'il numer 147 è vegnì confruntà pli pauc. Quest tema stat cun 11,8% mo pli sin plaz trais.
Il post da cussegliaziun declera quai cun la gronda purschida en l'internet. Ils giuvenils hajan savens access a l'internet e possian s'infurmar en la rait davart dumondas tar temas sexuals u d'amur. Gist perquai che quai saja in tema, tar il qual blers resentian turpetg da discurrer surlonder, saja quai l'alternativa pli simpla.
Chat da «Peer»
Per render anc pi accessibla sia purschida da cussegliaziun ha la Pro Juventute creà in chat sin la pagina 147.ch. I sa tracta qua dad in chat da «peer», nua che giuvenils pon scriver cun giuvenils e survegnir cussegliaziun. Ils giuvens cussegliaders vegnan accumpagnads da persunas cun experientscha.
RR novitads 17:00