L’onn avant muntava il gudogn a 25,1 milliuns francs. Cun quai è il gudogn quest onn var 4 milliuns pli aut. En sia communicaziun discurra la SRG SSR dad in resultat solid.
Situaziun pli difficila
Sa reducidas tar la SRG SSR èn las entradas da la reclama. Il minus da 15,4 milliuns francs mussia che la situaziun sin il martgà da reclama en televisiun saja daventada anc pli difficila, scriva la SRG SSR. Il resultat mussia plinavant il trend da plazzar la reclama en mediums digitals e da scursanir il budget per la reclama.
Damain entradas da taxas
Quest onn vul la SRG SSR sa preparar sin las novas cundiziuns da basa finanzialas. A partir da l’onn che vegn survegn ella anc 1,2 milliardas francs taxas. Quai sajan 50 milliuns francs damain che oz, scriva la SRG SSR. La taxa da recepziun che tut las chasadas han da nov da pajar vegn sbassada da 451 a 365 francs.
Mesiras da spargn ston esser
Suenter la votaziun davart l’iniziativa «No Billag» ha la SRG SSR annunzià mesiras da spargn da 100 milliuns francs. Tranter auter ponderescha ella da spustar ils studios da radio da SRF da Berna a Turitg. Decis n’è però anc nagut en chaussa.
A partir da l’onn che vegn vul la SRG SSR spargnar circa 80 milliuns francs tar l’infrastructura, l’administraziun, la tecnica, las immobiglias, ils process da producziun e tar la distribuziun. Era plazzas da lavur vegnan ad esser pertutgadas da las mesiras da spargn.
RR novitads 14:00