Perquai ch'il consum da tartuffels è s'aumentà dapi che las ustarias èn serradas il december passà, sto la Svizra numnadamain importar dapli. Uschiglio na bastassi betg per cuvrir la dumonda. Tranter ils 15 da matg e la fin da zercladur èsi pussaivel d'importar 5'000 tonnas dapli tartuffels, stat scrit en il Fegl uffizial federal.
Quai sajan radund tschintg pertschient da l'entir quantum annual, ha ditg ina pledadra da l'Uffizi federal d'agricultura sin dumonda da l'agentura da novitads Keystone-SDA. Tals augments d'import dettia adina puspè. Uschia hajan donns da schelira sfurzà il 2017 d'importar dapli maila.
Tut il cuntrari sa preschentia la situaziun però tar ils tartuffels da pommes-frites. Perquai che la glieud na mangia actualmain strusch pli en las ustarias, saja il consum da quests tartuffels sa reducì fermamain.
