Ils ospitals en il chantun Vad reageschan sin ils dumbers creschents da pazientas e pazients da Covid-19. Tuttas operaziuns betg urgentas vegnan spustadas. Uschia saja pussaivel da metter a disposiziun persunal e letgs per pazients da Covid-19 ed auters cas urgents.
Il mardi a bun'ura dumbrava il chantun Vad gia 34 pazients da Covid-19 sin las staziuns intensivas. Las prognosas mussian, che l'ospital universitar ed ils ulteriurs ospitals chantunals ston quintar fin la fin da l'emna cun var 80 pazients sin las staziuns intensivas, argumentescha il chantun Vad. Fin la fin da l'emna che vegn pudess il dumber da tals pazients schizunt sa dublegiar.
Las clinicas privatas na ston il mument anc betg sa tegnair vid questa nova regla. Tut tenor svilup da la situaziun ston dentant er quels prender las medemas mesiras.
Er il chantun Neuchâtel prenda mesiras
Er en il chantun Neuchâtel s'augmentan las ospitalisaziuns pervi dal coronavirus. Il dumber sa dublegia mintga 6 dis, hai num en ina communicaziun da la rait d'ospitals da Neuchâtel. Actualmain vegnan tractads en ils ospitals da Neuchâtel 90 pazients positivs da Covid-19 u cun suspect. In dumber che surpassa per 20% il nivel maximal dal mars.
La rait dals ospitals prepara perquai uss in augment dal dumber da letgs per pazients da Covid-19 e recrutescha ulteriur persunal.
Adattà al tema:
Tenor l'infurmaziun dad Andreas Stettbacher, il delegà dal Cussegl federal per il servetsch sanitar coordinà, pudessi gia en duas emnas vegnir critic cun ils plazs sin las staziuns intensivas dals ospitals svizzers.
