L'occupaziun en Svizra è sa meglierada levamain ils emprims mais da quest onn. Il dumber dals occupads saja s'augmentà l'emprim quartal 2017 per 0,4 pertschient, cumpareglià cun la medema perioda da l'onn passà. En cifras absolutas èn quai 20’000 plazzas dapli. La fin da mars hajan passa 4,8 milliuns persunas gì ina plazza da lavur. Quai ha annunzià l'Uffizi federal da statistica en ses barometer d'occupaziun.
Dapli plazzas hai dà surtut en il sectur da servetschs cun in plus da 0,7 %. Quai munta ad in augment da 27’000 plazzas. Percunter èn en l’industria 0,6 % – vul dir 7’000 plazzas idas a perder.
Era dapli plazzas libras
Remartgabel è era ch’il dumber da las plazzas libras è s’augmentà en relaziun tar l’emprim quartal da l’onn avant. L’Uffizi federal da statistica (UFS) ha annunzià 7’200 plazzas libras dapli. Quai correspunda ad in augment da 13,7%.
Las cifras dals statistichers mussan che las plazzas libras èn s’augmentadas tant en il sectur da servetschs sco era en l’industria. Per consequenza han las interpresas communitgà d'avair dapli difficultads da recrutar persunal scolà.
Il barometer d’occupaziun da l’UFS sa basa sin la dumonda da l’uffizi tar las interpresas, quantas plazzas libras che quellas han la fin dal quartal.
RR novitads 10:00