Siglir tar il cuntegn

Svizra Dapli protecziun per uffants

Era persunal da canortas e trenaders da sport duessan en avegnir esser obligads dad annunziar a las autoritads, sch'els han il suspect ch'in uffant vegn maltractà.

Legenda: Tadlar il audio «Mezdi: Cussegl naziunal – protecziun d'uffants era per sport e canorta?». Durada 2:22 minutas.
2:22 min, Actualitad dals 28.11.2017.

Per il mument han sulettamain magistras e magisters u lavureras e lavurers socials l'obligaziun dad annunziar a la KESB in suspect, ch'in uffant vegnia maltractà. Il Cussegl naziunal ha oz decis da schlargiar il circul da persunas che duain esser obligadas dad annunziar a la KESB, sch'i dat indizis ch'in uffant vegn maltractà corporalmain, psichicamain u sexualmain. Dentant va l'affar sco emprim anc en il Cussegl dals chantuns.

Cun quella decisiun ha il Cussegl naziunal midà sia opiniun. L’onn passà era il cussegl gnanc ì en sin la proposta. La PPS sco era la PLD avevan vuschà encunter. Uss han ils aderents sa mess tras, grazia a singulas vuschs da la PLD che han sustegnì la proposta. Dentant èn las premissas per ina annunzia vegnidas adattadas. La KESB duai mo vegnir infurmada, sch'i dat cumprovas concretas, ch'in uffant vegn maltractà.

Uffants maltractads

En ospitals svizzers vegnan tractads mintg’onn sur 1'400 uffants pervi da las consequenzas da maltractament. La cifra zuppada vegn dentant stimada anc bler pli auta. Bunamain la mesadad da las unfrendas èn uffants sut ses onns.

RR novitads 12:00