Siglir tar il cuntegn

Header

cuntegn

Dapli segirezza Cussegl naziunal vul sistem da communicaziun segir

150 milliuns francs ha il Cussegl naziunal approvà per in sistem segir da communicaziun. Cun quel duai esser pussaivel da communitgar durant situaziuns da crisa e da catastrofa tranter las autoritads.

Exercicis avevan mussà ch'il sistem actual da communicaziun saja manglus. Sche l'electricitad saja manglusa, crodian ils sistems or u sajan restrenschids fermamain. Plinavant manchia la pussaivladad da pudair preschentar la situaziun a moda generala. En cas d'ina catastrofa u situaziun d'urgenza duain il sistem da communicaziun ed il barat da datas tranter ils partenaris e la protecziun civila esser segirada.

La proposta va sco proxima en il Cussegl dals chantuns.

Attenziun tar la finanziaziun

Il credit d'obligaziun duai vegnir dà liber en trais etappas. Per l'emprima etappa duai dar 14,7 milliuns francs. Davart ils credits per la segunda etappa, da 83,7 milliuns e quel da la terza etappa da 51,7 milliuns, duai il Cussegl federal decider tenor il progress dal project.

Questa varianta garanteschia ch'i na vegnia betg simplamain fatg enavant en cas ch'il project escaleschia suenter l'emprima part, ha ditg Balthasar Glättli, il pledader da la cumissiun. Las fracziuns èn sa messas davos il project e quai senza opposiziun.

Artitgels legids il pli savens