Dapli segirezza sociala per las puras

Quai pretenda l’Uniun da las puras svizras en connex cun il di internaziunal da las puras la dumengia. Cun quai che las dunnas fetschian 36% da la lavur agricula en Svizra stoppian ellas er vegnir segiradas socialmain meglier, scriva l’Uniun en ina communicaziun da medias.

Scena en stalla. Bild in Lightbox öffnen.

Legenda da maletgs: Blera lavur prestada da dunnas na vegn betg a la glisch – La cumpart da las dunnas vi da las entradas vegn stimada bler pli pitschna. Keystone

Malgrà ch’ellas fetschian 36% da la lavur agricula in Svizra, sajan be 1,8% da las dunnas registradas sco manadras u possessuras da bains purils, scriva l’uniun sa referind sin las cifras dal 2015.

Naginas cifras concretas davart cumpart da puras vi dad entradas

En pli na dettia quai en Svizra naginas cifras tar la cumpart concreta da las dunnas vi da las entradas tras l’agricultura u vi da possess da terren.

Perquai na vegn betg stimà, quant che las dunnas contribueschan a las entradas. Lasuenter saja er la prevenziun da vegliadetgna e la segirezza sociala «magra». Quai scriva l'Uniun da puras svizra.

43% da las lavurs agriculas fan las dunnas

En connex cun il di internaziunal da las puras renda l’Uniun da puras svizra vinavant attent a la situaziun internaziunala. En tut il mund fetschian las dunnas 43% da las lavurs agriculas. Tuttina possedian ellas be 20% dal terren. Ellas nutreschan lur famiglias, van per aua e laina e lavuran sco engaschadas en l’agricultura.

Dapertut en il mund saja lur di da lavur pli lung che quel dals umens. Uschia lavuran per exempel las puras en il Benin mintg’emna radund 17 uras dapli ch’ils umens.

RR novitads 12:00