La surfatscha d'abitar per persuna è s'augmentada davent da 32 meters quadrat il 1980 sin 46 meters quadrat il 2019. Per l'ambient è quai in problem: Pli gronda l'abitaziun e pli bler energia che vegn duvrada per stgaudar quella. En il studi da l'ETH han 40% da las persunas dumandadas inditgà ch'els hajan midà en in'abitaziun pli gronda, malgrà che lur perchasa è vegnì pli pitschen. Be in quart fiss pront da midar en avegnir en in'abitaziun pli pitschna e radund in terz eran da l'avis che l'abitaziun nua ch'i stattan uss, saja gia memia pitschna.
Simbol da status, vischins, sfera privata
Sin fundament da las respostas han ils perscrutaders constatà plirs obstachels per midar en in'abitaziun pli pitschna. Vitiers tutga er il simbol da status che vegn collià cun ina grond'abitaziun, il conturn cun ils vischins e ch'i dettia dapli sfera privata en abitaziuns pli grondas.
Differentas schliaziuns
Il team propona pliras schliaziuns per motivar dad ir a star en abitaziuns pli pitschnas. Per exempel datti dapli abitaziuns pitschnas en il center da citads. Quellas èn colliadas bain cun il traffic public ed er ch'i dat savens en il medem bajetg pliras abitaziuns da differenta grondezza, quai fa pussibel da midar chasa senza perder il contact tar collegas u famiglia. Plinavant proponan ils perscrutaders che persunas che vulan ir d'ina abitaziun gronda en ina pli pitschna, duessan survegnir precedenza.
Tar il simbol da status fan ils perscrutaders cler ch'architectas ed architects sco er designers hajan ina rolla impurtanta da stgaffir simbols da status persistents, per exempel cun abitaziuns pli pitschnas che han dentant in aut standard da viver.